Prof. Nadir İsmayılov haqqında bioqrafik məlumat

Nadir İsmayılov 1937-ci il 28 avqust tarixində AZ SSR-nin Cəbrayıl rayonunun Cəbrayıl şəhərində anadan olmuşdur. Atası – İsmayılov Vedan Məşədi İsmayıl oğlu Böyük Vətən müharibəsinin veteranı, anası – İsmayılova Zərqələm Fərzəli qızı isə uşaq baxçasında müdirə olmuşdur.

Nadir İsmayılov 1944-1952-ci illərdə Cəbrayıl və İmişli rayonlarının və Rostov vilayətinin orta məktəbində oxumuşdur. Lənkəran Tibb məktəbini fərqlənmə diplomu ilə bitirdikdən sonra dörd il respublikanın müxtəlif tibb müəssisələrində çalışmışdır. Hərbi xidmətdən sonra N.Nərimanov adına ADTİ-nin müalicə profilaktika fakültəsinə qəbul olunmuş, 1968-ci ildə isə oranı bitirmişdir. İnstitutu bitirdikdən sonra 2 il Bakı şəhər 2№-li Kliniki Psixiatriya xəstəxanada həkim-psixiatr vəzifəsində çalışmış, 1970-ci ildən isə Azərbaycan Dövlət Tibb İnstitutunun psixiatriya kafedrasında işə başlamışdır. Şizofreniyanın immunoloji aspektləri ilə məşğul olmuşdur. 1973-cü ildə namizədlik, 1983-cü ildə isə doktorluq dissertasiyasını müdafiə etmişdir. 1999-cu ildən 2010-cu ilədək BDU-nun psixologiya kafedrasında professor vəzifəsində çalışmışdır. Onun rəhbərliyi altında 11 namizədlik dissertasiyası hazırlanmışdır. 1984-1993-cü illərdə AR SN-də baş psixiatrı işləmişdir. 1996-cı ildə Azərbaycan Psixiatriya Assosiasiyasının Prezidenti seçilmişdir. Psixiatriyada Qlobal Təşəbbüs Beynəlxalq Təşkilatının üzvi qismində bir neçə layihənin milli koordinatoru olmuşdur. Beynəlxalq Avropa Psixiatriya Assosiasiyasının, Psixoterapiya və Davranış Təbabəti Akademiyasının (ABŞ) Məsləhət Şurasının üzvüdür. Bir çox milli və beynəlxalq mükafat və diplomlarla təltif edilmişdir. “Tibbi psixologiya və sixoterapiya” və “Psixiatriya” kimi dərsliklərlə yanaşı 200-dən artıq elmi nəşrlərin müəllifidir. Üç övladı, 5 nəvəsi var.